LISUMBONO LEMALUNGELO ABESIFAZANE KUTEMIBHALO
.jpg)
Lisumbono lemalungelo abesifazane kutemibhalo limayelana nemalungelo laphelele lashicilelwe kumtsetfo sisekelo waseNingizimu Afrika. Bonkhe bantfu banemalungelo ekuphatfwa kahle ngenhlonipho kusukela kulabancane kuye kulabadzala, labandvuna kanye nalabasikati. Lamalungelo kumele asetjentiswe kutotonkhe tinhlangotsi temphilo jikelele kufake ekhatsi kuto tonkhe tinhlobo temibhalo, sibonelo, tindzaba letimfishane, tinkondlo, imidlalo, emanoveli naletinye.[1]
Emalungelo abesifazane kuyinye yetindzaba letimfishane
[hlela | edit source]Kubonakele kumibhalo letsite lengise ngayifundza kutsi babhali besilisa batfolakala betfula balingisi besifazane njengebantfu labatehluleki, labangakwati kutitsatsela tincumi, labatigebengu, labangenalo luvelo, labatinakisa kubantfu besilisa kanye nebantfu labangakwati kutimela. Kuyinye yetindzaba letimfishane umbhali wesilisa wetfule make losebentela umlingisi wesilisa longubabe lonetimali takhe letishisiwe kepha lowehlukana nemkakhe kanye nendvodzakati yakhe lengu Tfolakele. Lomlingisi lomdvuna besekagula kakhulu adzinga kutsi atfole lendvodzakati yakhe. Kepha umbhali wetfule lomsiti lomsikati longuLaTsabetse enta lisu lekutsi aletse umntfwana wadzadzewabo longu Lomatsemba kutsi ete atente shengatsi unguyeTfolakele lofunwa nguMagagula kute atemnika lifa lakhe lonkhe ngembi kwekutsi afe. Nangempela Magagula longumlingisi logulako wenta imizamo yonkhe ngekusebentisa ummeli wakhe longuTfwala kutsi afake kumaphephandzaba kanye nasemsakatweni kutsi Tfolakele lapho akhona awutfole lomlayeto.
Ngisivinini lesikhulu uLatsabetse weta nendvodzakati yadzadze wakhe ekuseni ngembulukusa, wamletsa kuMagagula. Wafika wametfula watsi nanguTfolakele utfolakele ngeliphephandzaba usuka eSwatini lapho abehlala khona namake wakhe. Waba nekusola Magagula kepha wagcina amemukele kutsi utfolakele Tfolakele loyindvodzakati. Kutsite ngelilanga lelilandzelako, watseleka Tfolakele aphetse liphephandzaba lebelibhalwe ngummeli waMagagula uyise wakhe. Wakhulekela kuLatsabetse kepha wamalela kutsi angene endlini kute ametfule kuTsabetse. Kulendzima umbhali usivetela bubi lobentiwe besifazane kulabanye besifazane, ngenca yekufuna kutiganyisa ngalokungakafaneli. Kulendzima bekulindzeleke kutsi LaTsabetse abe neluvelo lwekutsi sifiso saMagagula sesifezekile ngobe indvodzakati yakhe yangempela itfolakele.
Umbhali wetfule Tfolakele abuyela emuva esiteshini sematekisi, wacondzana nekutsi ummeli weyise nakatsi wengca ngemoto, ambone aphishekile ngekufundza liphephandzaba, wase uyambuta ngenkinga yakhe. Ngaleyondlela kwaba kusitakala kwakhe Tfolakele. Wabuyela kaMagagaula kanye nemmeli, wafike wametfula kuyise. Tfolakele waveta netitfombe litibufakazi bekutsi unguye sibili umntfwana waMagagula. Magagula wajbula kakhulu nakakhumbula letinye tetigameko letilandziswa nguTfolakele. Umbhali wetfula uLatsabetse abaleka emsebentini kanye nendvodzana yadzadze wakhe lenguLomatsemba ngobe naku phela ematsemba abo anyamalele ngenca yebugebengu. .
Umbhali akakawahloniphi emalungelo aLatsabetse ekutsi avelane naMagagula losesimeni sekugula kakhulu. Akukavami kutsi bomake bangabi nalo luvelo ikakhulukati kubabe logulako. Nakuso sigameko sekutfolakala kwaTfolakele umbhali uhlanekele kwephulwa kwemalungelo ngekusebentisa umlingisi longuLatsabetse longumlimgisi wesifazane kutsi kube nguye lokhinyabeta emalungelo aTfolakele ekutsi ahlangane neyiselonguMagagula. Umbhali wephule emalungelo aTfolakele ngekusebentisa umlingisi longuLatsabetse kutsi amcoshe. Umbhali uvete umlingisi longummeli Tfwala kutsi kube nguye losita Tfolakele ngobe Tfwala angumuntfu wesilisa, kepha laba besifazane umbhali ubetfule babantfu labahlukubeta emalungelo alabanye. Umbhali walendzaba lemfishane leyetfulwe kule-athikili utsatsa lihlangotsi lekuveta balingisi besifazane bangacabangeli labanye balingisi besifazane. Babhali betemibhalo abasekele emalungelo alabasikati kanye nalabadvuna ngalokulinganako kubalingisi babo emibhalweni leyehlukene.