Tibongo tenkhosi Mbandzeni

Madeya kaNdaba,

Wadeya inkhabi netimphondvo,

Watsenga emajaha,

Ngoba ubona emandanda akubhilingile.

Luhhawuhhawu lungankhondlo kaLozijiba,

Labatsi bayigidza bebayigobel' emadvolo.

Liphumile lilanga!

Wo buya Mngabashe!

Labashisa bantfu,

Labadzabula timvalo.

Baletsamela bantfwababoNoyi,

BantfwababoNkhotfotjeni baletsamela ematjeni,

Mkhonto ubanga tililo,

Ubanga tinyembeti.

Licili masonga kwabese kuyabonakala,

Usongele uMshadza khona kaThulwane,

Wasonga ngeMjindi,

Wasonga ngetiNjonjela,

Watsi Sibhejane

Yindlebe yakho yekubalalela,

Umkhosi uhlatjwe nguMampulo,

Watsi ngiyabika yehheni!

INdlavel' ihlome ngesokusa,

Kwasa timphungs tilel' etulu.

Mkhatsati wetimvemve tebeSutfu,

Labebatishaya batibetsanisa,

Bezsutfu bakaMabhula nebakaSasawana.

Sobakhandza ngekubakhandzanisa beSutfu,

Bebaphetse buhhobe,

Busesitjeni busesiswini,

Wase uyabuchitsa

Wase uyabusakata.

Lukhozi lumabhula

Laph' imihlambi idla khona,

YawoNgangaza kaMbok' eNtfonjeni

Ngoba ngihlangene naDlamini,

Achuba tinkhomo,

Atichuba ngeyendlunkhulu,

Lemahalahala.

Umgenuli wemaguma,

Kuyosala timphahla tibahawula,

Nanamuhla loku,

Solo tiyabahawula.

Bayethe!

Wena waPhakathi!