Tibongo tenkhosi Mswati II

TIBONGO TENGWENYAMA MSWATI WESIBILI

----------------------------------------

Mswati lomnyama kulabalutfuli.

Lodvungandzaba waseMbelebeleni.

Mkhephula ngajozi yaphalala ingati.

Mababal' ahlome nangelilanga lelibi,

Lobengadzinwa nakuhloma.

Lots' atidla ab' atifaka umgobo,

Lots' atidla watidla kaMabhoko.

Imamba leluhlata levuke

Etihosheni teluBhalule.

Inhlengetfwa leyavula tindlu kulabemukako.

Mswati ngitjele umuntfu lokwalako,

Ngitewuvuna insimu yakhe netingaba tayo.

Jozi gobana KoMadlenya.

Sibawuza simabanda ngamphondvo.

Gasa waManukuza!

Lohlasele ngelusongo kuMtjakeni abewakaMfuma,

Abetsi inyama yendlovu ayiphumi ekhaya,

Lohlasele ngelusongo kuMzila kaSoshangane,

Abetsi uMkhumbane kawuwelwa.

Ngob' indlela leya kaGasa ilukhondovana,

Ngihambe ngayo ngekweswela indlela,

Indlela lendze leya kaNdondoniya.

Lohlasele ngelusongo kuMphephetse,

Lohlasele ngelusongo kuMabhoko kaNsindeni,

Ngoba taboNdlela kaNciliba tigijima ngenshonalanga.

Mswati angisho kuwe kutsi unguMswati,

Ngitsi unguGwabini,

Ngoba utasigwaba netitsa.

Inkhankhu makhala kungakalinywa.

Wo buya Mswati!

Abosala emafusi hlanga.

Mswati ukhotse kungakamili tjani,

Lonyaka tjani sebumilile.

Inkhosi legwaze bantfu yaze yadzinwa,

Yaze yabatfumba njengetinkhomo.

Inkhosi yakitsi lehlabanako,

Ngingazange ngiyibon' inkhosi ihlabana,

Yagwaza ngelijozi yaze yadzinwa.

Kahle Mswati kucedza bantfu

Ngemvimbi nangemvimbetelo.

Tafa tinkhone nguTfwaphi.

Inyakuza.

Mavuso.

Ngekuvus' imiti ,

Imiti yemadvodza,

Khona beyingabola?

Mgobo kaLomphondvo

Awungen' emphalaneni,

Ungen' emagabelweni etiNyatsi,

Uvinjelwe yinjobo,

Beyiyembube, beyiyengwenyama.

Lomagadlagadla kaSobhuza.

Lomagadlagadla ashiy' imphi yakhe.

Mswati uchamile,

Ngoba wachama enkhomeni,

Wachama nasemuntfwini.

Bebatsi Mswati ngumfana,

Bebatsi usematfoleni.

Mangcimul' atfwale timphondvo.

Luhhawuhhawu lolufungwa ngulabemukako,

Batsi Mswati asiyubuya nakadzeni,

Ngoba Mswati uyabulalana.

Livuso leladl' umuntf' asesiswini,

Watsi longephandle wasindza ngekutibalekela.

Gijimani ngato tonkhe tindlela,

Niyewubikela Mpande kubakaZuli,

Nitsi indlovu idle lenye indlovu,

Yayeleka ngemahiya nemahlukuto.

Maphumangene nemahlabatsi.

Silwa ngemnyama nje kuyosa nini?

Inyoni kaMabitw' asabele,

Ubitwe nguShila kaMlambo,

Umbitele tinkhomo taMhlangala,

Ubitwe nguMawewe,

Umbitele tinkhomo taMzila kaSoshangane.

Ngelihwanca lakitsi lakaHhohho,

Lingasomi mlonyeni kumakhosikati,

Bebesaba tinjinji kuhlabana.

Ngoba buhwanca bakho Mswati ngibubalile,

Bungemashumi emashumi, buyeva.

Lomaviyoviyo,

Ngulotjab' umchopho.

Mahlal' elukhandzeni lweNyatsi,

Wentela beNyatsini,

Khona batekubalekela.

Lisikhiwa,

Lisivutfwa,

Kulamnyam' emakhiwa.

Nalapho akhona Mswati,

Bashela etindlini,

Kwavutsa tintsaba,

Kwavutsa Lufafa.

Kungatsi akusiye yena.

Simayedvwa longenambuteli.

Mabhunu kapiti sinisolile,

Ngekuhlab' inkhosi isavuna nine.

Mswati umbonaphi?

Emagumen' abonyoko,

Ngoba Mswati uhamba uyanyelela.

Bayethe

Wena waphakathi