KULOBOLA

Kulobola lisiko lemaSwati kanye naletinye tive te-Afrika. Nakulotjolwa kusuke kwakhiwa bunini bebukhoti, emindenini lemibili leyehlukene. kulobola akusiko kutsenga umuntfu njengobe kushiwo ngesilumbi. Utsi umuntfu akatsengwa ngobe angasilo liduku lekufinya. Ugcizelela atsi ngelisiko nangabe indvodza ilobola isuke itsenga intalo. Kungako nakutfolakele kutsi umfati ute intalo lusendvo lubese luyahlangana lwakabondvodza nelwakabomfati. Lendvodza itfunyelelwa dzadze wakabomfati kutsi atemtalela bantfwana. nawumtekile umfati angatfoli umntfwana kantsi washaya tinkhomo taphelela, bekukhishwa umtfwana wentfombatane kabolomfati anikwe umkhwenyane , kepha kuba ngumtfwana wakabomfati latalwa naye endlini. Boyise balomfati bayatibonela kutsi ngaletinkhomo lebatidla ngalomtfwana, akukhishwe intfombatane imikiswe. Leyo ntfombatana kutsiwa yinhlanti. Nakwentekile bangaboni bakabomfati, indvodza iyaya iyewutikhalela kepha icele kahle hhayi ngelulaka. ungacela ngelulaka ngeke bakunika, batsi lomntfwana akabulawanga ngibo kutsi angatali.